يوميات اتنين منفصلين

استعرض الموضوع السابق استعرض الموضوع التالي اذهب الى الأسفل

يوميات اتنين منفصلين

مُساهمة من طرف سندريلا في الأحد أكتوبر 25 2009, 21:58

خالد


نفسى
اشوفها واقولها وحشتينى ...... بجد وحشتينى



بس
مهما قلت ومهما اعتذرت اكيد مش هتسامحنى ولا حتى ممكن انها تسمعنى من
اساسه........ غلطه كبيره اوى وياريتنى اقدر اصلحها ونرجع تانى ........ ياريت






مريم


بجد
كانت غلطه ..... حبى لخالد كان اكبر غطه عملتها فى حياتى...........ازاى انا حبيت
الانسان دا ......



اللى
تاعبنى انى لسه فاكراه ......... فاكره كل تفاصيل علاقتنا ...... مش علشان بحبه انما
لان انا صعبت عليا نفسى انه يضحك عليا بالشكل دا



للاسف
لسه فاكره اول مره شوفنا بعض فيها ..... كان يوم مميز ..........






خالد


جدا
.. فعلا كان يوم مميز جدا ........ انا مش بشتغل فى الفرع دا من الشركه انا بشتغل
فى فرع تانى .... واليوم دا كنت بزور واحد صاحبى وبالصدفه دخلت قسم تانى بالغلط
يعنى.... دخلت لقيت الناس اللى فيه كلهم من سن واحد تقريبا وكلهم اصحاب وبيتكلموا
وبيهزروا وهما بيشتغلوا ... وعينى وقعت عليها .... كان لازم دا يحصل كانت اكتر
واحده بتتكلم وبتهزر مع كل اللى فى المكان وفضلت باصص لها حوالى خمس دقايق لحد لما
اخدوا بالهم انى فى المكان اصلا .... ولما اتديرت بصيتلى حسيت ان قلبى فجاه بقى
بيخبط مش بيدق انا كنت سامع صوته ....... ولما قالتلى اى خدمه ..... حسيت انى مش
فاكر انا هنا ليه اصلا






مريم


اول
ما شوفته حسيت بان الحد دا هيكون له مكانه فى حياتى..... معرفش ليه بس انا متعودتش
احس الاحساس دا ناحيه حد الا ويكون صح........ بس متوقعتش اننا ممكن فى يوم نرتبط



ولما
سالته اى خدمه مردش عليا.... مبقتش عارفه اقوله ايه...... ساعتها عدى صاحبه اللى
هو كان جايله من قدام المكتب وناداه .... قاله انت ايه اللى دخلك هنا تعالى يا
خالد



ودخل
سلم علينا واخد صاحبه وطلع ..... وساعتها كلهم ضحكوا الا انا فضلت متباعاه لحد ما
اختفى عن عنيا






خالد


خلصت
قاعدتى مع صاحبى اللى متكلمتش فيها اصلا ونزلت استناها قدام الشركه ....... وفضلت
واقف مستنى حوالى ساعتين........ ولما نزلت وقفت قدامها واعتذرتلها ...........
ولقيتها بتقولى على ايه محصلش حاجه ومشيت وسابتنى علطول ومن غير اى كلاما اتضايقت
جدا ما انا مش مستنى ساعتين علشان اعتذر على حاجه مش غلط






مريم


فرحت
لما لقيته واقف مخصوص علشان يعتذر ............ رغم ان الموقف مش مستاهل اعتذار ........
انما وقفته بالشكل دا كان دمها تقيل جدا........ مكنش ينفع اقف معاه وعلشان كده
مشيت ......... انما لما روحت قلت مكنش يصح انى امشى علطول كده على الاقل كنت
شكرته على وقفته دى ........ وتانى يوم روحت لصاحبه وحكيتله الموقف وقلتله قوله
انى متاسفه ........ وساعتها سمعت صوته جاى من ورايا وبيقول لى ...... طيب
ومتقوليهاش انتى ليه






خالد


اتربكت
ساعتها لما لقتنى وراها وهى بتقول لصاحبى اعتذرله ........ ومعرفتش تتكلم .......
فقلتلها ممكن طيب نشرب الشاى مع بعض فى كافتريا الشركه ولا برضه ميصحش.........
وطبعا وافقت لانها كانت حاسه انها كانت قليله الزوق معايا ........ويومها قعدنا
سوا واتكلمنا كتير اوى ............. حكينا عن نفسنا كتير ... ومع كلامها عن نفسها
لقيتنى بقول انها نوع جديد بجد اونى عاوزها وروحت يومها وانا مش عارف اعمل ايه
لازم اشوفها تانى وانا مينفعش افضل اخد اجازات كتير من الشركه



وبعدين
فى فرق بينا فى التربيه هى ملتزمه عنى...... هقولها ازاى انى كنت كل يوم مع واحده
وانى مش بثبت على حال وكمان الفرق اللى بينت عيلتى عيلتها ........... هغطيه ازاى






مريم


غاب
يومين وبصراحه كنت بفكر فيه باستمرار ........ وبعدها جالى الشركه وقالى انه
بيحبنى وعاوز يرتبط بيا .........كده من غير مقدمات ........... وساعتها انا كنت
فرحانه اوى ومخضوضه اوى ......... بس وافقت ومش عارفه ازاى انا رديت ساعتها
اصلا.........وبدء يحكيلى عن نفسه .......... قالى انه مهندس شاطر ومميز فى شغله
وانه من اسره محترمه ووالده موظف كبير فى هيئه حكوميه ووالدته رئيسه فرع فى شركه
عقاريه ...... قالى انه محتاج سبع شهور
ويكون جاهز انه يتقدم لاهلى .. وانا قلتله انه لازم يكلمهم ويديلهم خبر بانه موجود
وساعتها رحب جدا بالفكره وصمم انه يقابل بابا وفعلا رتب معاد وراح قابله فيه وفهمه
على ظروفه كلها وبابا مرفضش بالعكس دا رحب بيه جدا...






خالد


اتفاجئت
لما لقيت اهلها وافقوا بيا كده علطول وانا اللى فاكرها هتبقى حرب .......... ناس
طيبين اوى ومريم كمان طيبه اوى ومش عاوزه حاجه ... عينها مليناه جدا جدا
........ومش طالبه حاجه ورغم مستواها ووضع عيلتها كانت موافقه انها تعيش معايا فى
اى مكان وباى امكانيات



كنت
فرحان اوى بيها......... وبجد حبيتها
........ انما اللى فى داء ............ وانا بحب اعرف بنات واكون محبوب من
دى ودى ودى ........... وكان لازم هيجيلها يوم وتعرف دا ..........وعرفت






مريم



كانت
صدمه لما شوفته ماشى قدامى ومعاه واحده تانيه........... قلبى اتخلع من مكانه
وحسيت الدنيا بتلف بيا كلها........ ووقفت مش عارفه اتصرف ولا عارفه اعمل
ايه.......... فضلت افكر وفى الاخر محاولتش اواجهه كلمته فى التليفون وقلتله انى
شايفاه وانى عارفه اللى بيعمله دلوقتى وقفلت.........






خالد



اتكسفت
من نفسى انا عاوزها بس مش قادر استغنى عن علاقاتى التانيه ......... مريم فرصه صعب
حد يلاقى زيها انما انا بحب اعرف بنات كتير .......... ولو سبتها صعب الاقى فرصه
زيها تانى وضع وعيله واخلاق وبتحبنى الاقى زيها توافق بيا فين.........



فضلت
اعتذر كتير وهى كانت قلبها ابيض ..........
سامحتنى وعدت الغلطه دى على خير ............
بس انا مبطلتش






مريم


مكنتش
اتصور انه يحكى عنيى للى يعرفهم والاقيهم بيكلمونى وبيجولى الشغل ويقولولى ابعدى
عنه .......... مكنتش اتصور ان لو جاله تليفون قاله انى كنت مخطوبه قابله
ومقلتلهوش انه يشك فيا



انا
يتشك فيا ........... طب ازاى وليه ................ حسبى الله ونعم الوكيل






خالد


غبى
......... بجد غبى .......... انا مشكتش فيها انما انا غيرت وكمان ماصدقت مسكت عليها غلطه اشمعنى هى مسكت
عليا اكتر من غلطه ............ بس برضه غبى هى ما مسكتش عليا حاجه ........ دى
كانت بتحبنى وبتسامحنى مهما عملت



رغم
التليفونات اللى جتلها والكلام اللى عرفته سامحتنى .......... رغم انها كانت عارفه انى بعرف بنات عليها سامحتنى
............. رغم كل دا سامحتنى ووقفت جنبى.......... وكانت مستعده تتنازل عن
حاجات كتير فى حقوقها ......... كل اللى عملته وبرضه كان هاممها اننا نبقى
سوا ............. وانا كنت بدورلها على
غلطه






مريم


يومها
انفجرت فيه انا مش الحد اللى يتمسك عليه غلطه من النوع دا مستحيل ..............
وجعنى اوى انه مصدق وانه شاكك فيا ............. صرخت وعيط وانهرت ....... ومكنش
لاقى كلام يقوله ومكنش ممكن يلاقى كلام بس كان كفايه نظره الاسف اللى فى عينه وانا
سامحته لانى كنت بحبه






خالد


مكنتش
متصور انها هتعديهالى وتسامحنى .......... بس برضه اللى فيه داء استمريت برضه اعرف
بنات واعاكس دى واخرج مع دى ........... وكانت بتعرف لو مشافتنيش كانوا بيتصلوا
بيها يقولولها هما ........ وانا اتماديت لانى افتكرت انى ملكتها بحبها ليا وصبرها
عليا افتكرته ضعف منها لانها بتحبنى ومش قادره تبعد وكنت فاكر انها مش هتقدر تعمل
دا ابدا ..... بس لما حسيت انى هفقدها وانها بدئت تبعد وان كلامها واحساسها اتغير واجهتها
وواجهت نفسى .........



مريم


انا
قلت انه لما واجه نفسه كده خلاص هيبطل ......... خصوصا لما جهه اعتذرلى وقالى
اسف وانه مش هيكرر دا وانه لما حس انى
زهقت وخلاص هبعد عرف قيمتى وقرر انه ليا انا وبس ومش هيكدب تانى عليا ......... بصراحه
انا فعلا كنت قربت ايأس ........... بس لما اعتذر وقالى هيبطل انا سامحته وقلت
خلاص واحنا بنكبر مش بنصغر واهو هيعقل بكره لما ندخل فى الجد واهى كلها شهر وتخلص
المده اللى حددها وهنشوف






خالد


انا
فى الاول مكنتش واثق اننا هنكمل انما دلوقتى انا عاوزها وعاوز اكمل معاها
......... فاضل شهر ....... هقولها ازاى ان حكايه البنات دى مش الكدبه الوحيده
......... هقولها ازاى ان بابا وماما مش متعلمين اصلا وان امى ست بيت وان بابا
بيشتغل عامل بسيط فى مصنع ........ ازاى هقولها انى مش بشتغل مهندس بمؤهلى وانى
موظف فى العلاقات العامه ومرتبى صغير جدا وميكفيش جواز



انا
كنت بادئها لعب هعمل ايه دلوقتى .. ........ انا فكرت كتير اوى حاولت اعمل اى حاجه
حاولت اكتر من مره اقولها لكن خفت تسبنى لانها كان لازم تعمل كده ....... وقررت
ابعد انا من غير كلام وهى بكره هتفهم ........ انا اسف يا مريم مكنش فى قدامى حل
تانى بس والله بحبك






مريم


الصدمه
بجد انى معرفتش منه هو عرفت من تليفون جالى زى كل التليفونات اللى قبله الحكايه
كلها ............وجعنى انه كدب عليا وانه كان بادئها لعب من الاول ........... واجعنى
انه عرف يعمل كده فى حد حبه بجد......... ووجعنى اوى انى حبيته فى يوم ..........
شخص كداب اوى وانا ندمانه جدا انى عرفته......... بس الحمد لله انها خلصت لحد كده .......
الف حمد والف شكر ليك يارب .......

سندريلا

عدد الرسائل : 1
العمر : 28
الاوسمة :
تاريخ التسجيل : 25/10/2009

الرجوع الى أعلى الصفحة اذهب الى الأسفل

رد: يوميات اتنين منفصلين

مُساهمة من طرف HATEM_admin في السبت نوفمبر 21 2009, 20:43

ميرسى

_________________
السلام عليكم ورحمة الله وبركاته اهلا ومرحبا بكم فى منتدى جامد اخر حاجة ونتمنى ان تشاركونا فى جعل هذا المنتدى من المنتديات المعروفة والاكثر شعبية ويكون فعلا منتدى جامد اخر حاجة طـــــــــــــــــــــــــــــــحــــــــــــــــــــــــــــــن وارحب بكل الزوار admin
avatar
HATEM_admin
Admin
Admin

عدد الرسائل : 272
العمر : 28
الموقع : http://gamedak7er7aga.n-stars.org
العمل/الترفيه : computer & internet
المزاج : جامد اخر حاجة
تاريخ التسجيل : 04/04/2008

http://gamedak7er7aga.n-stars.org

الرجوع الى أعلى الصفحة اذهب الى الأسفل

استعرض الموضوع السابق استعرض الموضوع التالي الرجوع الى أعلى الصفحة


 
صلاحيات هذا المنتدى:
لاتستطيع الرد على المواضيع في هذا المنتدى